Ydych chi’n gorfod rhuthro i gael hyd i gyllid newydd pan ddaw grant i ben? Ydy’r egni sydd ei angen i wneud yr holl geisiadau amrywiol am gyllid yn teimlo’n werth chweil? Ydy’r broses o fodloni meini prawf grantiau weithiau’n teimlo fel ceisio rhoi darn sgwâr o bren mewn twll crwn?

Bydd arfer agwedd strategol tuag at godi arian yn helpu sicrhau fod gan eich elusen incwm cymysg sy’n canolbwyntio egni ar y meysydd codi arian hynny fydd yn dod â’r incwm mwyaf ichi. Yn y sesiwn ymarferol hwn byddwch yn adolygu perfformiad eich sefydliad ac yn adnabod eich strategaeth at y dyfodol.

Deilliannau i chi a’ch sefydliad:

• Proses i ddatblygu eich strategaeth codi arian, gan ystyried ffactorau sefydliadol a’r amgylchedd allanol.
• Gwerthuso opsiynau a chyfleoedd codi arian er mwyn penderfynu pa fethodoleg sydd fwyaf addas i’r achos, y sefydliad ac anghenion tymor byr a hirdymor.
• Paratoi cynllun blynyddol sy’n olrhain ar gyfer bob maes codi arian: targedau, gweithgareddau, amserlenni, dangosyddion perfformiad ac anghenion o ran adnoddau.
• Adolygiad o berfformiad eich sefydliad yn y gorffennol
• Cyfeiriad clir ar gyfer eich sefydliad a syniadau newydd ar gyfer codi arian

Ar gyfer pwy mae’r cwrs?

Mae’r cwrs hwn ar gyfer ymddiriedolwyr neu staff â swyddogaeth codi arian o fewn y sefydliad.