Mae’r prosiect Ffit i Ffermio yn dod â gwybodaeth iechyd a lles hanfodol yn uniongyrchol i’r sector amaethyddol mewn marchnadoedd da byw a digwyddiadau amaethyddol mawr ledled Powys. Wedi’i datblygu mewn partneriaeth â thîm Diogelu Iechyd Cymunedol a Lles Cyngor Sir Powys a Bwrdd Iechyd Addysgu Powys, nod y fenter yw cefnogi iechyd corfforol a meddyliol ffermwyr.

Deunaw mis yn cael ei ddatblygu, lansiwyd y prosiect yn swyddogol yn Sioe Frenhinol Cymru ym mis Gorffennaf 2024, gan gynnig amrywiaeth o wiriadau iechyd, gan gynnwys gwiriadau curiad y galon, mesur BMI, monitro glwcos yn y gwaed a phwysedd gwaed, a sgrinio carbon monocsid. Roedd ffermwyr hefyd yn gallu cael cymorth iechyd meddwl, cyfeiriadau meddygol ac asesiadau ffordd o fyw. Yn ystod y digwyddiad pedwar diwrnod, cynhaliwyd dros 1,100 o wiriadau iechyd.

Yn dilyn ei lansio, parhaodd Ffit i Ffermio gyda rhaglen fisol o ymweliadau â marchnadoedd da byw yn y Trallwng, Llanfair-ym-Muallt, ac Aberhonddu o fis Awst i fis Rhagfyr 2024. Yn nigwyddiadau mis Awst yn unig, cafodd 30 o bobl wiriadau iechyd ym mhob marchnad. Mynychodd y prosiect hefyd Arwerthiant Hyrddod yr NSA yn Llanfair-ym-Muallt (Medi) a Ffair Aeaf deuddydd CAFC (Tachwedd).

Cyflwynir y prosiect gan dîm ymroddedig ym mhob digwyddiad, gan gynnwys Nyrs Glinigol Arbenigol, Swyddogion Diogelu Iechyd Cymunedol a Lles, Cysylltydd Cymunedol PAVO, a chynrychiolwyr o Mind Canolbarth a Gogledd Powys, Ponthafren, Mamwlad, ac Ymddiriedolaeth Canser Lingen Davies.

Diolch i Lesley Cormelio (Rhwydwaith Cymunedol Ffermio), Jamie Burt (Pontafren), Sue Newham (PAVO), a Michael Crawshaw sy’n cynrychioli SaTH am yrru’r fenter hon yn ei blaen ac archwilio opsiynau ar ran y sector. Diolch yn arbennig i’n partneriaid, yn enwedig Cymdeithas Amaethyddol Frenhinol Cymru.

Yn olaf, diolch i Dr. Greg Langridge-Thomas (Cyngor Sir Powys) am sicrhau cefnogaeth y Cyngor a’r Tîm Hybu Iechyd drwy ei bapur academaidd ‘Farming Fit’.