Am y gronfa
Ni fedrwn dderbyn ceisiadau ar ôl y dyddiad cau sef 20 Chwefror, 2022 am 11:59pm.
Mae pandemig Covid-19 wedi amlygu pwysigrwydd cymorth a leolir yn y gymuned a rôl cymunedau o ran mynd i’r afael ag unigrwydd ac ynysigrwydd cymdeithasol. Defnyddir y gronfa i feithrin gallu a chynaliadwyedd sefydliadau gwirfoddol a chymunedol ar lawr gwlad, sy’n dod â phobl o bob oed at ei gilydd.
Mae’n rhaid i ymgeiswyr ddangos yr angen ar gyfer eu prosiect o safbwynt unigrwydd ac ynysigrwydd, gan gynnwys unrhyw effaith yn sgil y pandemig, cwmpas y cynnig, sut y caiff ei reoli a’i gyflenwi a’r canlyniadau fydd yn cael eu gwireddu.
Hefyd mae’n rhaid i geisiadau ddangos sut mae’r cynnig yn diwallu un neu fwy o Bedair Blaenoriaeth Llywodraeth Cymru:
Cynyddu cyfleoedd i bobl gysylltu â’i gilydd
A fydd eich prosiect yn creu cyfleoedd i bobl gysylltu â’i gilydd?
Seilwaith cymunedol sy’n cefnogi cymunedau cysylltiedig
A fydd eich prosiect yn datblygu seilwaith megis cynlluniau cludiant cymunedol neu glybiau cinio?
Cymunedau cydlynus a chefnogol
A fydd eich prosiect yn helpu meithrin gwydnwch yn y gymuned?
Meithrin ymwybyddiaeth a hyrwyddo agweddau positif
A fydd eich prosiect yn helpu codi ymwybyddiaeth am effaith unigrwydd ar fywydau pobl a chynnig ffyrdd i fynd i’r afael â hyn?
Yn bennaf, diben y buddsoddiad yw cefnogi sefydliadau llai lleol yn y meysydd canlynol:
Ehangu gweithgareddau sydd eisoes yn bodoli
Ail-sefydlu presenoldeb a gollwyd oherwydd y pandemig
Hyrwyddo gwasanaethau ar lefel ehangach
Cyllido defnydd o leoliadau addas
Bylchau gwasanaeth a nodwyd ym Mhowys:
Cymorth ymarferol ac ym maes llesiant i unigolion sy’n gaeth i’w cartrefi
Cymorth cymheiriaid i famau newydd
Ymweliadau lles a chymorth yn y cartref i’r henoed
Cymorth ym maes iechyd meddwl a llesiant i bobl dan 50 oed
Cymorth un-i-in i bobl ifanc yn eu harddegau
Cymorth i bobl sydd â nam difrifol ar eu golwg neu eu clyw
Byddwn yn blaenoriaethu ceisiadau sy’n canolbwyntio ar ddarparu ymatebion lleol pwrpasol a chymorth graddfa fach a seilir yn y gymuned. Gellir defnyddio’r cyllid ar gyfer gweithgareddau sy’n dod â phobl ynghyd wyneb yn wyneb mewn lleoliad diogel, neu gellir ei ddefnyddio i gefnogi gweithgareddau ar-lein os taw dyna sydd fwyaf priodol - neu’r unig ffordd - i feithrin cysylltiadau cymdeithasol, e.e. os oes trafferth gyda mynediad at leoliad neu ar gyfer y sawl nad ydynt yn barod eto i gwrdd â phobl wyneb yn wyneb.
Gellir defnyddio’r cyllid ar gyfer costau refeniw yn unig sy’n gysylltiedig â’r math yma o weithgareddau. Ni chaniateir ei ddefnyddio ar gyfer costau cyfalaf ac ni chaniateir dyblygu unrhyw gyllid sydd gennych eisoes.
Mae grantiau o rhwng £250 a £2,500 y flwyddyn ar gael, a gall sefydliad ymgeisio am gyllid ar gyfer hyd at dair blynedd am y cyfnod 2022 - 2024. Nid oes rhaid ichi wneud cais am yr un swm bob blwyddyn.
Cymhwysedd
Gall eich sefydliad ymgeisio os mae’n bodloni’r meini prawf cymhwysedd canlynol:
Sefydliad trydydd sector/sector gwirfoddol yw (dielw) ac yn annibynnol o sectorau’r llywodraeth, preifat a chyhoeddus
Elusen gofrestredig
Grŵp cyfansoddedig
Cwmni Buddiant Cymunedol
Sefydliad Corfforedig Elusennol
Cwmni cyfyngedig trwy warant
Cwmni cyfyngedig trwy gyfranddaliadau lle mae un o’r uchod yn dal y cyfranddaliadau (h.y. is-gwmni busnes cymdeithasol sy’n eiddo i Elusen)
Cymdeithas Ddiwydiannol a Darbodus (IPS) ar ffurf Cymdeithas Budd Cymunedol (BenCom)
Cymdeithas gydfuddiannol Ariannol
Bydd y cyllid ar gael ar gyfer gweithgareddau/gwasanaethau/cymunedau ym Mhowys
Mae gan eich sefydliad o leiaf 2 lofnodwr awdurdodedig
Ni chaniateir i’ch sefydliad wneud cais os ydych yn:
Sefydliad gwleidyddol
Sefydliad statudol
Sefydliad preifat
Unigolyn
Mae’n rhaid i sefydliadau sy’n ymgeisio am y grant:
Gael dogfen llywodraethu
Gael cyfrif banc
Dangos y gallu i reoli grant
Dangos fod ganddynt bolisïau ac yswiriant perthnasol
Ymateb i un neu fwy o’r Pedair Blaenoriaeth a nodwyd fel blaenoriaethau cyllido, a dangos tystiolaeth o angen
Bydd staff PAVO yn cynnal gwiriadau diwydrwydd dyladwy cyn cyflwyno ceisiadau i gael eu hadolygu gan banel. Os nad oes gan eich sefydliad yr holl bolisïau perthnasol yn eu lle, gall PAVO gynnig cefnogaeth mewn perthynas â hyn.
Mae cefnogaeth Swyddog Datblygu PAVO ar gael i unrhyw sefydliad sydd am gyflwyno cais. Byddem yn argymell cysylltu â ni cyn cyflwyno eich cais. Dylid cysylltu â Haydn Taylor, Swyddog Datblygu Gwerth Cymdeithasol rhwng 9am - 5pm, dydd Llun - Mercher.
Ebost: haydn.taylor(at)pavo.org.uk
Rhif ffôn: 01597 822191
PWYSIG
Bydd ymgeiswyr llwyddiannus yn derbyn 100% o’r grant ar ôl cwblhau’r gwaith papur angenrheidiol.
Bydd ymgeiswyr ar gyfer prosiectau sy’n parhau am fwy na blwyddyn yn derbyn taliadau blynyddol o’r grant, ar yr amod eu bod yn cyflwyno’r data monitro y gofynnir amdano
Bydd methu â chydymffurfio â chais i ddarparu data monitro yn arwain at atal taliadau blynyddol
Bydd gofyn i grwpiau gyflwyno adroddiad monitro blynyddol
Gall methu â chydymffurfio â chais i ddarparu data monitro olygu na allwch wneud cais am grantiau sy’n cael eu gweinyddu gan PAVO yn y dyfodol
Bydd methu â chydymffurfio â’r amod hwn yn arwain at broses o ‘hawlio arian yn ôl’ efallai a hwyrach y caiff grwpiau eu gwahardd rhag mynediad at gyllid yn y flwyddyn ganlynol.
Unwaith y bydd eich cais yn barod, dylid ei anfon at: grants(at)pavo.org.uk ynghyd â’r dogfennau atodol angenrheidiol.