Mae 7 o'r cynlluniau hyn ym Mhowys - 2 ym Maldwyn (yn y Trallwng a Machynlleth), 3 ym Maesyfed (Llandrindod, Llanandras a Threfyclo) a 2 ym Mrycheiniog (Llanfair-ym-Muallt a Chrughywel).  Mae'r ardaloedd lle mae'r cynlluniau hyn ar waith yn amrywio, ond ni fyddai'r gwasanaeth ar gael i aelodau'n byw mwy na 10 milltir o leoliad y cynllun. 

Mae'r holl gynlluniau'n gweithredu yn debyg i'w gilydd; mae'r Grwp Gwirfoddol yn codi arian o ffynonellau amrywiol, ac yn defnyddio'r arian yma i sicrhau prisiau gostyngedig ar gyfer teithiau tacsi y mae aelodau'n eu cymryd.  Mae aelodau'n derbyn tocynnau 50c hyd at gyfanswm o £50, neu £100 i'r rhai sy'n byw mewn ardaloedd mwy anghysbell. Wedyn gellir defnyddio'r tocynnau hyn i dalu am hanner cost y daith mewn tacsi, e.e. dim ond £1 ar gyfer siwrnai fyddai fel arall yn costio £2, a byddai'n bosib gwneud y teithiau hyn 50 o weithiau mewn blwyddyn. 

Mae cwmniau tacsi yn gallu hawlio gwerth y tocynnau gan y Grwp Gwirfoddol, ac mae'n rhaid i'r cwmniau hynny sydd am fod yn rhan o'r cynllun arwyddo cytundeb gyda'r Grwp Gwirfoddol. 

Mae'r nifer o aelodau yn y cynlluniau'n amrywio o 30 yn y rhai lleiaf, i ymhell dros  150 yn y cynlluniau mwy. Yn y mwyafrif o'r cynlluniau, cyfyngir aelodaeth i'r bobl hynny sydd mewn oed, yn anabl neu'n dioddef o gyflwr meddyliol neu gorfforol sy'n golygu ei fod yn anodd iddynt ddefnyddio dulliau cludiant cyffredin. 

Mae'n werth ystyried dulliau lle gall Cynlluniau Cerdyn Tacsi wella eu ffordd o weithio, oherwydd maent yn ffordd fforddiadwy a hyblyg o deithio i grwpiau difreintiedig mewn ardaloedd gwledig. Gyda lwc, byddant yn parhau i ddarparu'r gwasanaeth hwn a'i ddatblygu dros y blynyddoedd sydd i ddod.